Skepper-Onderhouer-Verlosser: Vrydag 22 Desember

Kol 1:16  “…want in Hom is alle dinge geskape.”
Kol 1:17: “…en in Hom hou alle dinge stand.”
Kol 1:20 “…dat Hy deur Hom alles met Homself sou versoen…die dinge op die aarde sowel as die dinge in die hemele”

Jesus Christus is Skepper, Onderhouer en Verlosser van alle dinge. Dieselfde Christus Wie my en jou van ons sondes verlos het, het ook alles in die hemel en op die aarde geskape.  Daar is geen noodsaak vir enige ander toevoeging nie. In Christus alleen is alles geskape en ook versoen met God. Jesus Christus is Middelaar oor letterlik alle dinge. 

‘n Mens hoor dit nog veels te veel dat al wat werklik saak maak in die Christelike geloof is of jou verhouding met Christus reg is.  Hierdie sielkundige benadering verskraal die geloof tot ‘n saak net tussen jou en God en kan maklik lei tot inwaartsgekeerde mense wie bevestiging soek in hulleself van ‘n gesonde verhouding met God. So ‘n inwaartse en vergeestelike fokus mis gou dat God Homself deur Christus geopenbaar het as Skepper en Onderhouer van hemel en aarde.

Aan die ander kant ervaar jy dalk juis die natuur rondom jou as ‘n manier om nader tot God te kom. Bring ‘n onbelemmerde sig op die magtige sterrehemel en verwondering oor die kleinste plantjie of diertjie ons nie nader aan God nie? Natuurlik. Maar daar is streng beperkings daaraan om geestelike vernuwing te wil koppel aan ons natuurbelewing. God is nie een met die skepping nie. Ons mag die skepping sien as God se handewerk, sy tempel, iets van sy goedheid en prag, maar dit is nooit direk gekonnekteer met wie God is nie en bring ons streng gesproke ook nie nader aan God nie. Die versoening is al bereik, al Persoon Wie ons nader aan God bring, is Christus. Die aanskouing van die skepping wek ons eer en lofprysing aan God op, anders verval al daardie goedheid en mooiheid wat ons raaksien en ervaar al te gou in selfsug en afgodery (Rom 1). 

Een van die belangrikste kategoriëe in die openbaring van God aan ons, is die onderskeid tussen Skepper en skepping. Ons is skepsels. God is die Skepper; “…alle dinge is deur Hom en tot Hom geskape.” (vers 16).  Daar is ‘n onmeetlike grens tussen God aan die een kant en mens en die res van die skepping aan die ander. God voer egter sy plan met die hele skepping uit in en deur Jesus Christus, deur wie Hy homself ook aan die hele wêreld geopenbaar het binne die tyd en ruimte van hierdie geskape werklikheid.

Deur Christus word alles met God versoen. Deur die bloed van die kruis op Golgota is die vrede herstel vir alles op aarde en in die hemel (vers 20). Glo jy ook in hierdie ongelooflike grootheid van Christus?

Sing: Ps 150:1

Refleksie: Laat die enorme implikasies van hierdie teks op jou inwerk. Hoe leef ons as versoende mense in ‘n versoende skepping en onder ‘n versoende hemel?