Aarde en aanbidding: Saterdag 30 Desember 

Ps 24:1: “Die aarde en alles wat daarop is, die wêreld en die wat daar woon, alles behoort aan die Here…” (VB)

‘n Mens hoor dit nog steeds veels te veel dat om te werk in God se koninkryk iets geestelik moet wees, terwyl die bou en bewaring van God se skepping eintlik maar gewoon en selfs ondergeskik is. Sommiges beweer selfs dat die materiële dinge in die skepping minderwaardig of selfs kwaad is, terwyl net die geestelike dinge kwansuis goed is.

Gaan lees Ps 24 in sy geheel.  Die verwysing na God as Eienaar van die hele aarde en alles wat daarin woon en die aanbidding tot God staan in reëlregte verbintenis tot mekaar.  Daar is geen skeiding tussen die aardse en geestelike in hierdie Psalm nie! In tipiese Hebreeuse poëtiese styl gebruik die psalmis die woorde “aarde” en “wêreld” (vers 1) in parallel om sy punt te maak. Dit gaan hier nie net oor mense nie, maar oor alles, elke skepsel – lewend of nie-lewend. Al mag dit dalk voel dat jy nie verstaan hoe so ‘n verbintenis dan werk nie, weet ons dat die Psalms poëties is en ons die moontlikheid gee om die ervarings en emosies wat ons het onder woorde te bring.  Die grootheid van God se skepping roep op tot eerbetoon!

Die Israeliete destyds het die Psalms gesing as deel van hulle aanbidding en hierdie Psalm is heel moontlik gekomponeer toe die ark op feestelike wyse teruggebring is in die stad (2 Sam 6:5,13).  Daarna is die Psalm telkemale gesing as die ark saamgegaan het oorlog toe en weer teruggekom het. Volgens oorlewering het die Jode later in ballingskap hierdie Psalm elke Sondag gesing om die eerste dag van die Skepping te herdink.  Die funksie van die Psalms oor die algemeen was om die verbintenis tussen God en diegene wie Hom aanbid te versterk. 

Vandag geld daardie Psalms nog net soveel vir ons.  Die eredienste en rituele van die Israeliete destyds was toe al ‘n afskaduing van Christus (Kol 2:17). Christus was die vervulling dat al die volke in Abraham geseën sal wees (Gen 12:3). Dink daaroor wat dit beteken dat Jesus Christus vandag hierdie Psalm saam met jou lees en sing.

Die woorde in vers 1 wat na die aarde verwys is nie uitgesluit uit aanbidding nie. So asof ons van die skepping geniet of daarin ons terapie vind, dit miskien met ‘n foto vasvang, en dan vervolgens weer oorgaan tot die werklike meer belangrike geestelike sake.  Inteendeel! Hierdie Psalm maak dit duidelik dat alles op hierdie aarde en alles wat hier woon aan God behoort en dat dit verweef is met aanbidding.  

Sing: Ps 24:1-5

Refleksie: Kyk rondom jou. Alles behoort aan die Here. Sien die grootheid maar ook die detail. Bring lof en eer aan die Here.