Eersgeborene: Kersdag ~ Maandag 25 Desember

Kol 1:15: “Hy is…die Eersgeborene van die hele skepping”
Kol 1:18: “…Hy wat die begin is, die Eersgeborene uit die dode, sodat Hy in alles die eerste kan wees”

As ons die woord eersgeborene lees, moet ons nie onmiddelik biologies wil dink nie. Dit sou sommer gou, en het al te dikwels in die verlede die gedagte laat posvat dat Christus dalk ‘n goeie mens en selfs dalk ‘n god was, maar tog uiteindelik uit die Vader gebore en dus ook geskep is. Christus sou dus ‘n skepsel wees. Dit is ‘n groot dwaalleer wat vandag nog in allerlei vorme terugkeer as ons te min oor die voortreflikheid van Christus dink en as ons allerhande ander maniere bedink buite Christus om oor hoe om by God uit te kom. 

Die woord eersgeborene in Bybelse konteks wys op die erfgenaam se regte.  Dit beteken nie om die eerste skepsel te wees nie, maar om ‘n unieke posisie as erfgenaam te beklee.  Lees nou ook Rom 8:29 en Heb 1:6. In hierdie tekste word Jesus Christus ook die eersgeborene genoem wat sy rangorde bo die skepping aandui - Christus is nie deel van die skepping nie, inteendeel Hy is die begin van die skepping en diegene deur wie God alles geskep het (Heb 1:2, Op 3:14) Christus het gesag oor die hele nuwe mensheid en is erfgenaam van die nuwe skepping.  Jesus Christus is Yahweh se nuwe Adam en nuwe Israel.  Christus vervang Israel se benoeming as eersgebore seun van God (sien Ex 4:22).  Nou in Christus is daar ‘n gemeente van “…eersgeborenes wat in die hemele opgeskrywe is” (Heb 12:23). 

Christus is ook eersgeborene uit die dode, Wie gevolg sal word deur die wat aan Hom behoort (I Kor 15:23; 1 Thes 4:16). Al sien mens nog soveel dood in die skepping, daar sal opstanding wees tot ‘n nuwe lewe op die nuwe hemel en nuwe aarde.  Al op hierdie aarde mag jy al iets beleef van hierdie vernuwing. 

Die Skepper-Koning Wie ons in Ps 24 ontmoet het, is ook die Beeld van God en erfgenaam van die nuwe herskape mensheid en die herskepping.  Om aan Christus, die Skepper-Koning, Beeld van God en Eersgeborene te behoort, bring dood en vernuwing voort. In jou en my lewe, maar net so goed ook in die hele skepping. 

Sing: SB 63:1-6.

Refleksie:  Al op hierdie aarde mag ons iets beleef van God se herskepping. Lees Kol 3:1-17 asook Rom 6:3-11 en reflekteer oor die vraag hoe ‘n vernuwde lewe in Christus lyk. Hoe sal so lewe spesifiek lyk met betrekking tot die bou en bewaar van God se wonderlike skepping?